Lëvizja Vetëvendosje (LVV) ka mbështetur marshin për drejtësi “Liria ka Emër”, e cila do të mbahet këtë të diele me 2 prill prej orës 14:00 në Sheshin “Zahir Pajaziti”.

Sipas një postimi në rrjetin social në Facebook, faqja zyrtare e LVV bën të ditur se instanca gjyqësie kanë provuar ta gjykojnë luftën e UÇK-së, por asnjëra nuk gjeti gjë.

“Lufta jonë çlirimtare është prej ngjarjeve historike më të vlefshme që kemi. Falë kësaj lufte të drejtë, sakrificës, Ushtrisë Çlirimtare të Kosovës, dëshmorëve dhe martirëve tanë, gëzojmë lirinë dhe shtetin që e kemi sot. Instanca të njëpasnjëshme gjyqësie kanë provuar ta gjykojnë luftën tonë çlirimtare por asnjëra nuk gjeti asgjë”, kanë bërë të ditur nga LVV duke shtuar se “ Andaj edhe u formua kjo gjykatë e padrejtësisë speciale që po i mbanë krerët e luftës tonë në Hagë”.

Tutje në njoftim thuhet se Rexhep Selimi së bashku me LVV-në ishin kundër themelimit të Gjykatës.

“Rexhep Selimit, ish-shefit të grupit tonë parlamentar, anëtarit të Kryesisë, që së bashku me Lëvizjen ishin kundër themelimit të kësaj gjykate, i është këputur përgjysmë angazhimi i rëndësishëm e kontributi i mirë për vendin. Por, është e sigurt se Rexha ashtu siç ka kryer secilën punë me sukses do të dali fitimtar edhe në betejën e radhës.

Ne jemi të bindur se ata do ta tejkalojnë me faqe të bardhë edhe këtë sfidë, duke mbrojtur edhe njëherë luftën e drejtë të UÇK-së dhe popullit të saj nga akuzat e padrejta dhe nga fushatat që synojnë përbaltjen e luftës së shqiptarëve të shtypur”, shkruhet në postimin e LVV-së, në Facebook.